Á laugardaginn kemur, 20.september fer fram á skotvelli Skotfélags Reykjavíkur á Álfsnesi kvennamót í haglabyssu-skeet. Keppt verður í byrjendaflokki og einnig í flokki kvenna sem lengra eru komnar í íþróttagreininni. Mótið hefst kl.12:00 og stendur fram eftir degi. Hvetjum alla áhugasama um skotfimi að kíkja nú við og sjá hvernig stelpurnar eru að skjóta.

Íslandsmótið í riffilkeppninni Bench Rest skori var haldið á Álfsnesi í dag. Íslandsmeistari varð Egill Þ. Ragnarsson úr Skotfélagi Reykjavíkur en hann varð efstur bæði í 100 metrum og 200 metrum með alls 489 stig og 13 x-ur. Hann var með 250/9x á 100 metrum og 239/4x á 200 metrum. Í öðru sæti varð Kristján R. Arnarson úr Skotfélagi Húsavíkur með 481/14x stig (245/11+236/3) og í þriðja sæti Alfreð F. Björnsson úr Skotdeild Keflavíkur með 481/7x stig (245/5+236/2). Nánari úrslit koma á úrslitasíðu STÍ á morgun og eins verða einhverjar myndir frá mótinu aðgengilegar hérna.

Sunnudaginn 14. sept verður haldið Íslandsmeistaramót í Benchrest í Skori á 100- og 200metrum. Mótið er skotið á einum degi. 100 metrarnir byrja kl 10:00 og 200 metrarnir hefjast kl 14:00.

Skráningu á Íslandsmótið í Bench Rest á sunnudaginn kemur á Álfsnesi, lýkur annað kvöld.

Örn Valdimarsson úr Skotfélagi Reykjavíkur setti í dag nýtt glæsilegt Íslandsmet í Skeet á Bikarmeistaramóti STÍ á Akureyri. Hann skoraði 120 stig af 125 mögulegum (22-24-25-24-25) Hann varð jafnframt Bikarmeistari STÍ en þann titil hlýtur sá skotmaður sem bestum árangri nær yfir keppnistímabilið. Í öðru sæti varð Sigurður J. Sigurðsson úr Skotíþróttafélagi Hafnarfjarðar með 107 stig og Ómar Ö. Jónsson úr Skotfélagi Akureyrar varð þriðji með 106 stig. Í unglingaflokki mætti aðeins einn keppandi að þessu sinni, Sigurður U. Hauksson úr Skotfélagi Reykjavíkur, en hann náði nú samt næstbesta árangri dagsins með 110 stig. Í kvennaflokki sigraði Snjólaug M. Jónsdóttir úr Skotfélaginu Markviss, með 48 stig af 75 mögulegum (16-16-16) sem er jöfnun á Íslandsmeti hennar. Hún varð jafnframt Bikarmeistari STÍ í kvennaflokki. Í öðru sæti varð Dagný H. Hinriksdóttir úr Skotfélagi Reykjavíkur með 40 stig og í þriðja sæti Helga Jóhannsdóttir úr Skotíþróttafélagi Hafnarfjarðar með 32 stig. Í liðakeppni karla sigraði sveit Skotfélags Reykjavíkur með 333 stig, í öðru sæti varð A-sveit Skotfélags Akureyrar með 303 stig og í þriðja sæti sveit Skotíþróttafélags Hafnarfjarðar með 276 stig._/gkg