Aðalfundur félagsins var haldinn í Egilshöllinni í kvöld. Megnið af fundartímanum fór í umræður um útisvæði félagsins á Álfsnesi. Ársreikningar voru lagðir fram og samþykktir samhljóða. Stjórnin var endurkjörinn samkvæmt lögum félagsins og er nú skipuð þannig að Jórunn Harðardóttir er formaður, Arnbergur Þorvaldsson varaformaður, Guðmundur Kr. Gíslason gjaldkeri, Kjartan Friðriksson ritari og meðstjórnandi er Örn Valdimarsson. Varamenn eru Kjartan Örn Kjartansson og Sigfús Tryggvi Blumenstein.

Hér er smá innlegg í umræðuna um mikla og stöðuga hávaðamengun frá starfsemi SR á Álfsnesi. Umrædd hávaðamengun er talin það mikil að hún flæmi fuglalíf í burtu frá svæðum hinum megin við Kollafjörð. Ef svo er hvernig má það vera að við erum í vandræðum vegna ásóknar fugla í að verpa á skotvöllum okkar eins og sést á myndinni í viðhenginu?  Á SKEET-velli nr. 2 hefur tjaldapar gert sér hreiður og var verpt í það á tímabilinu 14:00 til 15:00 síðastliðinn mánudag. Það var í miðjum opnunartíma þess dags.

Evrópumeistaramótið í Ólympísku skotgreinunum er nú haldið í Osijek í Króatíu. Það hefur vakið athygli hve vellirnir þar eru nálægt byggð og í góðri sátt við alla íbúa. Hér í Reykjavík eru hins vegar sjónarmið örfárra látin ráða því hvernig íþróttastarf tengt skotfimi fer fram og endalaus áróður sem borgaryfirvöld virðast ætla að kyngja látin ráða för. 

Af www.sti.is:

Íslensku keppendurnir hófu keppni í morgun á EM í Króatíu. Í haglabyssugreininni Skeet eru okkar keppendur Hákon Þ. Svavarsson, Pétur T. Gunnarsson, Stefán G. Örlygsson, Helga Jóhannsdóttir og Dagný H. Hinriksdóttir. Í riffilgreinunum 50m og 300m liggjandi keppir Jón Þ. Sigurðsson fyrir okkur og byrjar hann keppni á morgun. Einnig voru skráð í loftskammbyssu þau Ásgeir Sigurgeirsson og Jórunn Harðardóttir en þau urðu að hætta við þátttöku.

Dagskráin er svona:

Skeet karla 26.-27.maí

Skeet kvenna 26.-27.maí

50m riffill 27.maí

Skeet parakeppni 28.maí

Skeet liðakeppni karla 29.maí

300m riffill 2.júní

Á laugardaginn verður prófdómari vegna hreindýraprófanna á staðnum frá kl.12 til 16. Bara mæta og klára. Hérna færðu allar upplýsingar um próftökuna á heimasíðu UST.