Ellert Aðalsteinsson úr SR sigraði í haglabyssugreininni SKEET á Landsmóti UMFÍ í dag. Í þriðja sæti varð annar SR-ingur, Stefán Gísli Örlygsson og Karl F.Karlsson varð í tíunda sæti. Þeir kepptu allir fyrir ÍBR, Íþróttabandalag Reykjavíkur og höluðu inn 19 stigum í liðakeppninni. Nánari úrslit hér til hliðar. Keppni í enskum riffli, sem halda átti á morgun, hefur verið flutt til Kópavogs vegna veðurs og hefst kl.10:00 í Digranesi. Hægt er að fylgjast með keppninni í beinni útsendingu á heimasíðu Skotfélags Kópavogs.

Heimsbikarmótið í Granada á Spáni er nú að hefjast. Í fyrramálið heldur Ásgeir Sigurgeirsson utan en hann keppir í Frjálsri skammbyssu á laugardag og sunnudag. Á miðvikudaginn keppir hann svo í loftskammbyssu. Hákon Þ.Svavarsson og Ellert Aðalsteinsson fljúga svo út á sunnudaginn og keppa í skeet á miðvikudag og fimmtudag. Hægt verður að fylgjast með keppni þeirra á heimasíðu ISSF hérna.

Landsmót UMFÍ á Selfossi hefst á fimmtudaginn með keppni í skeet á velli SFS í Þorlákshöfn og heldur áfram á föstudeginum. Á laugardaginn er keppt í enskum riffli í Þorlákshöfn og á sunnudaginn í loftskammbyssu og loftriffli í reiðhöllinni við Brávelli. Keppni hefst alla dagana kl.10:00. Við eigum fjóra keppendur í hverri grein en okkar fólk keppir undir merkjum ÍBR, Íþróttabandalags Reykjavíkur.

Unglingurinn frá Húsavík, Sigurður Unnar Hauksson (106), sigraði á landsmótinu eftir keppni við Hákon Þ. Svavarsson úr SFS sem var efstur eftir undankeppnina og jafnaði þar Íslandsmetið með 115 stig. Okkar maður Örn Valdimarsson (107) varð þriðji eftir harða keppni við annan SR-ing, Ellert Aðalsteinsson (104). Í fimmta sæti varð Jakob Þ. Leifsson (110) úr SÍH og í 6. sæti okkar maður Guðmundur Pálsson (103).  Í liðakeppni sigraði A-sveit SR með 302 stig  og sveit SA hafnaði í öðru sæti með 300 stig. SÍH varð svo í 3ja sæti með 294 stig.

Í kvennaflokki sigraði Helga Jóhannsdóttir (32) úr SÍH, önnur varð Snjólaug M. Jónsdóttir (33) úr MAV, sem jafnaði Íslandsmetið og þriðja Anný B. Guðmundsdóttir (16) úr SÍH. Okkar dama, Dagný Hinriksdóttir (31), varð í fjórða sæti.

Nánari úrslit má sjá hér

Á aðalfundi Skotfélags Reykjavíkur, sem haldinn var í Íþróttamiðstöðinni í Laugardal í kvöld, var Jórunn Harðardóttir kjörin formaður félagsins til næstu tveggja ára. Aðrir í stjórn eru Guðmundur Kr. Gíslason, Kjartan Friðriksson, Örn Valdimarsson og Arnbergur Þorvaldsson í aðalstjórn og í varastjórn Sigfús Tryggvi Blumenstein og Hermann Kristjánsson.